පාස්කු නඩුවෙන් පූජිත - හේමසිරි නිදහස් කළ තීන්දුව බල රහිත කරයි
2024 November 05- Page Views : 30
බුද්ධි තොරතුරු ලැබී තිබියදීත් පාස්කු ප්‍රහාරය වළක්වා නොගැනීම සම්බන්ධයෙන් චෝදනා කරමින් ගොනු කළ නඩුවෙන් හිටපු පොලිස්පති පූජිත ජයසුන්දර මහතා සහ හිටපු ආරක්ෂක ලේකම් හේමසිරි ප්‍රනාන්දු යන මහත්වරුන්ට එරෙහිව මහාධිකරණය පවරා තිබූ නඩුවෙන් ඔවුන් නිදොස් කොට නිදහස් කරමින් ප්‍රකාශිත නඩු තීන්දුව බල රහිත කළ ශ්‍රේෂ්ඨාධිකරණය එම නඩුවේ විත්තිවාචක කැඳවන ලෙස මහාධිකරණ ත්‍රි පුද්ගල විනිසුරු මඩුල්ලට අද (05) නියෝග කළේය.
ශ්‍රේෂ්ඨාධිකරණයේ මෙසේ නියෝග කළේ මහාධිකරණ තීන්දුව අභියෝගයට ලක් කරමින් නීතිපති වරයා ගොනුකළ අභියාචන පෙත්සම් දෙකක් පිළිබඳව සිය තීන්දුව ප්‍රකාශ කරමිනි.
ශ්‍රේෂ්ඨාධිකරණ විනිසුරුවරුන් වන ප්‍රීති පද්මන් සූරසේන, යසන්ත කෝදාගොඩ,කුමුදුනී වික්‍රමසිංහ, මහින්ද සමයවර්ධන, අර්ජුන ඔබේසේකර යන පංච පුද්ගල ශ්‍රේෂ්ඨාධිකරණ විනිසුරු මඩුල්ල විසින් මෙම තීන්දුව ප්‍රකාශයට පත් කෙරිණි.
මෙම අභියාචන පෙත්සම් වල තීන්දුව එම විනිසුරු මඩුල්ලේ සභාපති විනිසුරු ප්‍රීති පද්මන් සූරසේන මහතා විසින් විවෘත අධිකරණයේ දී ප්‍රකාශයට පත් කරන කෙරිණි.