දකුණු අමෙරිකානු සහ මධ්‍යම අමෙරිකානු කලාපයටම දැනෙන ලෙස පැනමාවට බලපෑ රික්ටර් මාපකයේ 7.7ක ප්‍රබලත්වයෙන් යුත් භූමිකම්පාවක් හේතුවෙන් එරටට සහ අසල්වැසි රටවල් රැසකට දැඩි බලපෑම් එල්ල වී තිබේ. මෙරට වේලාවෙන් ඊයේ (9) රාත්‍රියේ සිදුවූ මෙම ව්‍යසනකාරී තත්ත්වයත් සමග කලාපය පුරා සුනාමි අනතුරු ඇඟවීම් නිකුත් කෙරුණු අතර, කොලොම්බියාව, ඉක්වදෝරය, නිකරගුවා, කොස්ටාරිකා සහ ග්වාතමාලාව යන රටවලටද එම අවදානම බලපෑවේය. අමෙරිකා එක්සත් ජනපද භූ විද්‍යා ආයතනයට (USGS) අනුව පැනමා නගරයට කිලෝමීටර් 200ක් පමණ දුරින් පිහිටි ජනාවාස අඩු ප්‍රදේශයක, කිලෝමීටර් 12.6ක ගැඹුරින් මෙම භූමිකම්පාව හටගෙන ඇත. මේ වන විටත් පසුකම්පන 80කට අධික ප්‍රමාණයක් වාර්තා වී ඇති අතර, භීතියට පත් දහස් සංඛ්‍යාත ජනතාවක් ආරක්ෂාව පතා වීථි වෙත පැමිණ සිටිති. පැනමා නගරයට නිරිත දෙසින් පිහිටි පෙනොනෝම් නගරයේ හෝටලයක කොටසක් කඩා වැටීම ඇතුළු ගොඩනැගිලි රැසකට හානි සිදුව ඇත. කෙසේ වෙතත්, වාසනාවකට මෙන් කිසිදු ජීවිතක්ෂයට පත්වීමක් හෝ බරපතළ තුවාල ලැබීමක් මෙතෙක් වාර්තා වී නැත. එහෙත්, එරට පළාත් 6ක විදුලිය බිඳවැටීම් වාර්තා වී තිබේ. මෙම හදිසි තත්ත්වය හමුවේ වුවද, රටේ ප්‍රධාන ආර්ථික මර්මස්ථාන වන පැනමා ඇළ මාර්ගය, කොබ්‍රේ පැනමා තඹ පතල සහ ටොකුමෙන් ජාත්‍යන්තර ගුවන්තොටුපළ (තාවකාලික ගුවන්ගමන් තහනම ඉවත් කිරීමෙන් පසු) මේ වන විට සාමාන්‍ය පරිදි ක්‍රියාත්මක වෙමින් පවතී. කෙසේ වෙතත් මෙම ව්‍යසනය හේතුවෙන් පැනමාවේ දළ දේශීය නිෂ්පාදිතයෙන් 1%ත් 10%ත් අතර ප්‍රමාණයේ ආර්ථික අලාභයක් සිදුවිය හැකි බවට පුරෝකථනය කර ඇත. මෑතකදී වෙනිසියුලාවේ සහ කොලොම්බියාවේ සිදුවූ ප්‍රබල භූමිකම්පා සමග සසඳන විට, මෙම භූමිකම්පාවෙන් එවැනි දහස් ගණනක ජීවිත බිලිගැනීමේ ඛේදවාචකයක් සිදු නොවීමට ප්‍රධාන හේතුව වී ඇත්තේ, එම ප්‍රදේශවල ජීවත් වී ඇත්තේ 43,000ක් වැනි සීමිත පිරිසක් පමණක් වීමය. වෙනිසියුලාව සහ කොලොම්බියාව වැනි කලාපවල භූමිකම්පා ඇතිවූ අවස්ථාවලදී මිලියන 1.4කට හා 1.6කට අධික ජනතාවක් ජීවත්ව සිට ඇත.