මාස 04 කට අවශ්‍ය ගෑස් ගන්න ගිවිසුමට අත්සන් කිරීම අද
Thu, June 30, 2022- Page Views : 0 results
මාස 4කට අවශ්‍ය ගෑස් මෙට්ට්‍රික් ටොන් ලක්‍ෂයක් මිලදී ගැනීමට අදාළ ගිවිසුමට අද දිනයේ අත්සන් කිරීමට නියමිතව තිබේ. ඒ, ලිට්‍රෝ සමාගම සහ ලෝක බැංකුව අතරයි. ලෝක බැංකුවේ සහාය මත මෙම ගෑස් තොගය දිවයිනට ලබාගැනීමටයි නියමිතව ඇත. ඊට වැය වන මුදල අමෙරිකානු ඩොලර් මිලියන 90 කි. ඉන් ඩොලර් මිලියන 20 ක් ලිට්‍රෝ සමාගම ලබාදෙන බවයි අග්‍රාමාත්‍යවරයාගේ විශේෂ කමිටු නියෝජිත හිටපු අමාත්‍ය සාගල රත්නායක මහතා පැවසුවේය.
එම ගෑස් තොගයෙන් කොටසකට අයත් නෞකා ජූලි 06, 10, 16, 19 සහ 21 යන දිනවලදී දිවයිනට ළගාවීමට නියමිතව තිබේ. ජූලි 30 වනදා වනවිට ගෑස් මෙටි්‍රක් ටොන් 33,000 ක් දිවයිනට ලැබෙනු ඇති බවටයි ආණ්ඩුව විශ්වාසය පළ කර ඇත. එහිදී අදහස් පළකළ අග්‍රාමාත්‍ය රනිල් වික්‍රමසිංහ මහතා පැවසුවේ රටේ ආර්ථික කඩා වැටීමට කරුණු 4 ක් බලපා ඇති බවයි.
මේ අතර ලංකා ඛණිජ තෙල් නීතිගත සංස්ථාව සතු ඉන්ධන තොග සම්බන්ධයෙන්ද මෙහිදී ප්‍රකාශ කෙරුණි. මේ වනවිට සංස්ථාව සතුව පවතින්නේ ඩීසල් මෙටි්‍රක් ටොන් 11,000 ක් පමණක් බවයි අග්‍රාමාත්‍යවරයාගේ විශේෂ කමිටු නියෝජිත හිටපු අමාත්‍ය සාගල රත්නායක ප්‍රකාශ කළේය.
පෙට්‍රල් පවතින්නේ මෙට්ට්‍රික් ටොන් 5,000 ක් පමණයි. මෙට්ට්‍රික් ටොන් 30,000 ක දැවි තෙල් ප්‍රමාණයක් මේ වනවිට රට තුළ පවති. භූමිතලේ සහ ගුවන් යානා ඉන්ධන පවතින ප්‍රමාණය මෙටි්‍රක් ටොන් 800 ක් දක්වා පහත වැටී තිබෙන බවයි මෙහිදී ප්‍රකාශ කෙරුණි.
පෙට්‍රල් නෞකාවක් දිවයිනට පැමිණීමට නියමිතව ඇත්තේ ජූලි 22 වනදායි. ඊට පෙර තවත් ඉන්ධන නෞකා දෙකක් මෙරටට ලබාගැනීමට ඉන්දියාව සමග සාකච්ඡා කරන බවයි අග්‍රාමාත්‍යවරයාගේ විශේෂ කමිටු නියෝජිත හිටපු අමාත්‍ය සාගල රත්නායක එහිදී සඳහන් කළේය. ඩීසල් නෞකාවක් මෙරටට ජූලි මස 11 වනදාත් 15 වනදාත් අතර කාලයේදී දිවයිනට ළඟවීමට නියමිතව තිබේ.
මේ අතර ඉන්ධන ලබාගැනීමේ අරමුණින් තවදුරටත් ජනතාව පෝලිම්වල රැදී සිටි. ප්‍රදේශ කිහිපයක එලෙස රැදී සිටි පුද්ගලයන්ගෙන් කළ විමසීමකදී ඔවුන් ප්‍රකාශ කළේ දින තුනකට අධික කාලයක සිට අඛණ්ඩව තමන් එලෙස පෝලිම්වල රැදී සිටින බවයි.
බොහෝ පිරිසක් IOC ඉන්ධන පිරවුම්හල් ආශ්‍රිතව එලෙස රැදී සිටින බව අප වාර්තාකරුවන් පැවසුවේය. IOC ඇතැම් ඉන්ධන පිරවුම්හල්වල ඉන්ධන නිකුත් කරනු ලබන්නේ ටෝකන් පත්‍ර ක්‍රමයටයි.