ප්‍රාණඇපකරුවන් නිදහස් කරන්න: සල්ලි දෙන්නම්

ගාසා තීරයේ හමාස් සටන්කාමීන්ගේ ග්‍රහණයේ පසුවන ඉතිරි ඊශ්‍රායල ප්‍රාණ ඇපකරුවන් නිදහස් කරන ලෙසත්, එක් ප්‍රාණ ඇපකරුවකු වෙනුවෙන් ඇමෙරිකන් ඩොලර් මිලියන 5 ක මුදලක් ගෙවීමට සූදානම් බවත් ඊශ්‍රායල අග්‍රාමාත්‍ය බෙන්ජමින් නෙදන්යාහු පවසයි.

ඊශ්‍රායල අග්‍රාමාත්‍යවරයා මෙසේ පැවැසුවේ, වෙඩි නොබදින කබායකින් සහ හමුදා සෙබළුන්ගේ හෙල්මට්ටුවකින් ගාසා තීරයේ සංචාරයක නියැලෙමිනි. තවමත් ඊශ්‍රායල වැසියන් එකසිය එක් දෙනකු හමාස් ප්‍රාණඇපයේ පසුවන අතර, ඔවුන් කෙසේ හෝ නිදහස් කර ගැනීම අග්‍රාමාත්‍ය නෙදන්යාහුගේ අරමුණ වී ඇත.

මීට අමතරවව, ගාසා තීරයේ සංචාරය කරමින්, හමාස් සටන්කාමීන් සමඟ සටන් වදින ඊශ්‍රායල සොල්දාදුවන් හමුවෙමින්, ඊශ්‍රායල අග්‍රාමාත්‍යවරයා අවධාරණය කළේ හමාස් සටන්කාමීන්ට යළි කිසිම දවසක හිස ඔසවන්න ඉඩ නොදෙන බවය.

හමාස් සටන්කාමීන්, ලෙබනන්යේ හිස්බුල්ලා සටන්කාමීන්ගේ ද සහාය ඇතිව, 2023 ඔක්තෝබර් 7 වැනිදා, දේශසීමා හරහා ඊශ්‍රායලයට ඇතුළු වී පහර දී ඊශ්‍රායලයේ සිටි ඊශ්‍රායල වැසියන් ඇතුළු විදේශිකයන් 1200 ක් ඝාතනය කළේය. ඉන්පසු ඊශ්‍රායල වැසියන් 250 ක් ගාසා තීරයට රැගෙන ගියේ ප්‍රාණඇපකරුවන් ලෙසය.

ඔවුන්ගෙන් වැඩි දෙනකුට කෙටි සටන් විරාමයක් අතරතුරේ නිදහස හිමිවුණු අතර, තවත් පිරිසක් ඊශ්‍රායල බෝම්බ ප්‍රහාරවලින් ජීවිතක්ෂයට පත්වුණු බව පැවැසිණි.

ඊශ්‍රායල හමුදා ගාසා තීරයට එල්ල කරන ප්‍රහාර හේතුවෙන් ගාසා හමාස් වැසියෝ 44,000 ක් මියගොස් ඇති අතර, තුවාල ලබා ඇති ගණන 103,898 කි. ඊශ්‍රායල අග්‍රාමාත්‍යවරයාගේ අණ පරිදි එරට හමුදාව ගාසා තීරයට පහර දෙන්නේ, හමාස් සටන්කාමීන් ගාසා තීරයෙන් මුලිනුපුටා දැමීමේ අරමුණ ඇතිවය‍.