එළැඹෙන වසරේදී 2 සහ 6 ශ්‍රේණි සඳහා නව විෂයමාලාව හඳුන්වා දීමට පියවර ගන්නා බව අග්‍රාමාත්‍ය ආචාර්ය හරිනි අමරසූරිය මෙනවිය පවසයි. බදුල්ල දිස්ත්‍රික් කාන්තා සමුළුවට අද (18) එක්වෙමින් අග්‍රාමාත්‍යවරිය මේ බව සඳහන් කළාය. එහිදී වැඩිදුරටත් අදහස් දක්වමින් අග්‍රාමාත්‍යවරිය පැවසුවේ, මෙම වසරේදී පළමු ශ්‍රේණිය සඳහා නව විෂයමාලාවක් හඳුන්වා දුන් බවත්, ඉදිරි වසර දෙක තුළ දෙවන සහ හයවන ශ්‍රේණි සඳහා නව විෂයමාලා හඳුන්වා දීමට සැලසුම් කර ඇති බවත්ය. සියලු දරුවන්ගේ අනාගතය සුරක්ෂිත වන අයුරින් වත්මන් රජය විසින් නව අධ්‍යාපන ක්‍රමවේදයක් සකස් කර ඇති බව ද එහිදී ඇය සඳහන් කළාය.

විභාගයට පමණක් මුහුණ දෙන දරුවකු වෙනුවට, අනාගතය පිළිබඳ බලාපොරොත්තු සහිතව අභියෝගවලට සාර්ථකව මුහුණ දිය හැකි පරපුරක් බිහිකිරීම රජයේ ප්‍රධාන අපේක්ෂාව බව ද අග්‍රාමාත්‍යවරිය මෙහිදී අවධාරණය කළාය.

මේ අතර, ගුරුවරුන් 17,000ක් බඳවා ගැනීම සඳහා නොවැම්බර් 20 වැනිදා සිට සම්මුඛ පරීක්ෂණ ආරම්භ කරන බව ද අග්‍රාමාත්‍යවරිය මෙහිදී වැඩිදුරටත් පැවසීය.

විශ්ව විද්‍යාල පද්ධතියට ආචාර්යවරු 2,000ක් බඳවා ගැනීම සඳහා අනුමැතිය ලබා දී ඇති බවත් මේ වන විට එම බඳවා ගැනීම් සිදු කෙරෙමින් පවතින බවත් මෙහිදී හරිනි අමරසූරිය මෙනවිය අනාවරණය කළාය.

ලබන වසරේ පෙබරවාරි මාසය වන විට සමස්ත අධ්‍යාපන පද්ධතියට අලුතින් ගුරුවරුන් 30,000ක් පමණ බඳවා ගැනීමට සැලසුම් කර ඇති බවත්, ඊට අමතරව පාසල්වල යටිතල පහසුකම් සංවර්ධනය කිරීම සඳහා විශේෂ වැඩපිළිවෙළක් ක්‍රියාත්මක කරන බවත් අග්‍රාමාත්‍යවරිය සඳහන් කළාය.