මෙසීගේ ඉන්දීය සංචාරය ආරම්භයේදී අවුල් වියවුල් : විරෝධතා දැක්වූ රසිකයෝ ක්‍රීඩාංගණ ආසන ගලවා විසි කරති

ආර්ජන්ටිනාවේ සහ ඉන්ටර් මයාමි (Inter Miami) කණ්ඩායමේ පාපන්දු සුපිරි තරුවක් වන ලියොනල් මෙසීගේ (Lionel Messi) ඉන්දීය සංචාරය අතරතුරදී විශාල පිරිසකගෙන් යුත් පරිවාර කණ්ඩායමක් විසින් ඔහුව වට කර සිටීම නිසා රසිකයන්ට ඔහුව දැක ගැනීමට නොහැකි වීමෙන් පසුව දැඩි නොසන්සුන්කාරී තත්ත්වයක් ඇතිව තිබෙනවා. ඉන්දීය මාධ්‍ය වාර්තා කළේ, මිනිත්තු 20ක් වැනි කෙටි කාලයක් මෙසී ක්‍රීඩාංගණයේ රැඳී සිටීමෙන් පසු, කොල්කටා හි සෝල්ට් ලේක් ක්‍රීඩාංගණයේ (Salt Lake stadium in Kolkata) සිටි රසිකයන් කෝපයට පත්වී ක්‍රීඩාංගණ ආසන ගලවා හා වෙනත් වස්තූන් පිට්ටනියට හා ධාවන පථයට වීසි කළ බවයි. එසේම, ක්‍රීඩාංගණය වටා ඇති වැටට නැග ගත් කිහිප දෙනෙකු ද වස්තූන් පිටියට වීසි කරන අයුරු සමාජ මාධ්‍ය ඔස්සේ හුවමාරු වන වීඩියෝපටවලද පටිගත වී තිබෙනවා. එමෙන්ම, රසිකයින් චෝදනා කර ඇත්තේ, "නායකයෝ සහ නළුවෝ විතරයි මෙසී වට කරගෙන හිටියේ. එහෙනම් ඇයි අපිව කැඳෙව්වේ? ... අපි රුපියල් 12,000කට ($130) ටිකට් ගත්තා, නමුත් ඔහුගේ මූණවත් දැකගන්න බැරි වුණා" යනුවෙන්. මෙසීගේ මෙම ඉන්දීය සංචාරය අතරතුර කොල්කටා, හයිද්‍රාබාද්, මුම්බායි සහ නවදිල්ලි යන නගරවල ප්‍රසංග, යෞවන පාපන්දු සායන, පඩෙල් (padel) තරඟාවලියක් සහ පුණ්‍ය කටයුතු කිහිපයක් සඳහා සහභාගී වීමට නියමිතව තිබුණා. මෙම සිදුවීම සම්බන්ධයෙන් කණගාටුව පළ කරමින්, බටහිර බෙංගාල ප්‍රාන්තයේ ප්‍රධාන අමාත්‍යවරිය වන මමතා බැනර්ජී (Mamata Banerjee) මෙසීගෙන් සමාව ඉල්ලා ඇති අතර සිදුවීම පිළිබඳව පරීක්ෂණයක් සඳහා නියෝග කර තිබෙනවා.