ප්‍රතිකාරවලට එහා ගිය මීගලෑව රෝහල

රෝගීන්ගේ මානසික සුවය මෙන්ම රෝහලේ සුබ සාදන කටයුතු සඳහා ද ආර්ථිකමය අතින් සෙත සැලසෙන අයුරින් මුළු රෝහල් භූමියම වගා කටයුතු සඳහා යොදා ගනිමින් රාජකාරියට අමතරව රෝහලේ සංවර්ධනයට වෙහෙස මහන්සිය දරන වෛද්‍යවරුන් සහ සේවක සේවිකාවන් පිරිසක් මීගලෑව ප්‍රාදේශීය රෝහලේ දී අපට හමු විය.

මීගලෑව ප්‍රාදේශීය රෝහලේ ස්ථාන භාර වෛද්‍ය නිලධාරී මහින්ද උයන්ගොඩ මහතාගේ උපදෙස් පරිදි වෛද්‍ය දිලිනී අබේවර්ධන, වෛද්‍ය චමීකා වික්‍රමසිංහ ඇතුළු අනෙකුත් වෛද්‍යවරුන් ද හෙද හෙදියන් සහ රෝහලේ සෙසු කාර්ය මණ්ඩලයේ සියලු දෙනාගේ ද සහයෝගය ඇතිව ඔවුහු මෙම වගාවල නියැලෙති.

රෝහල් භූමියට ඇතුළු වන සියලු දෙනාගේ ගත සිත සනහාලමින් සොබා දහමට නැවුම් අත්වැලක් සපයමින් ඔවුන් මෙම භූමියේ පතෝල, තක්කාලි, රාබු, බීට්, බණ්ඩක්කා, කෙසෙල්, මිරිස්, මෑ ආදී වගා රැසක් සිදු කර තිබේ.

රාජකාරියට අමතරව ලැබෙන සෑම විවේක අවස්ථාවකදීම වගා කටයුතුවල ඵලදායිතාව වෙනුවෙන් කැපවීමට මෙහි සියලු සේවක සේවිකාවෝ කටයුතු කරති.

අනුරාධපුර දිස්ත්‍රික්කයත් කුරුණෑගල දිස්ත්‍රික්කයත් යා කරන මායිමේ කුරුණෑගල දිස්ත්‍රික්කයට අයත් වයඹ පළාතේ මෙම රෝහල පිහිටා තිබේ.